Á liðnu sumri var haldið norrænt vinabæjamót á Patreksfirði.
Þátttakendur í mótinu voru frá öllum vinabæjum Vesturbyggðar, en þeir eru Bogense í Danmörku, Svelvik í Noregi, Vadstena í Svíþjóð og Naantali í Finnlandi.

Það er ekki ofsagt að gestirnir hrifust mjög af ungri söngkonu á Patreksfirði Guðnýju Gígju Skjaldardóttur, en hún skemmti gestunum oftar en einu sinni á meðan á dvöl þeirra stóð við afar góðar undirtektir gestanna.

Í kjölfar þessa hafa forráðamenn Norræna félagsins í Bogense og Bogensebæjar á Fjóni í Danmörku boðið Guðnýju Gígju í heimsókn til Bogense og kosta ferðina frá Patreksfirði og heim aftur.

Þeir sem eru helstu hvatamenn að þessari heimsókn hafa unnið að undirbúningi hennar allt frá því að þeir fyrst heyrðu Guðnýju syngja og fer Guðný til Danmerkur þann 13. mars og verður gestur Bogense allt til 22. mars.

Heimsóknin er mjög vel skipulögð og verður hún án efa bæði Guðnýju og heimamönnum í Bogense til mikillar ánægju.

Svo fátt eitt sé nefnt af því sem á dagskránni er mun Guðný heimsækja nokkra skóla, m.a. tónlistarskóla, vera viðstödd tónlistarviðburði af ýmsu tagi, ýmist sem þátttakandi eða áheyrandi. Hún mun verða gestur á fundi Norræna félagsins þar sem haldin verður Íslandskynning með myndasýningu. Farið verður í skoðunarferð um norður Fjón og margt skemmtilegt skoðað og gert. Dagskráin er mjög vel útfærð og er bæði fróðleg og skemmtileg.

Svo vel er utan um gestinn haldið að hún verður sótt á Kastrupflugvöll , síðan verður hún í félagsskap góðs fólks allan tímann og í lok heimsóknarinnar ekið aftur á flugvöllinn.

Góða ferð Guðný !

Megir þú njóta fararinnar sem allra best. Við heimamenn erum auðvitað sprengstolt af þér og hlökkum til að fá ferðasöguna þegar þú kemur til baka.

Prentvæn útgáfa